ILOILO CITY – May yara sang ginahimu nga lihok ang Local Economic Enterprise Office agud nga indi makalab-ot sa syudad sang Iloilo ang African Swine Fever.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga nagapakig-angot na siya sa Department of Agriculture kag sa Bureau of Animal Industry agud nga mabantayan ang ila tagsa ka jurisdictional assignment.
Suno kay Castañeda, nagapatigayon sang inspection sa tagsa ka merkado sa syudad sang Iloilo ang Meat Inspection team agud nga masiguro nga wala sang kontaminado nga meat products nga makalusot.
Ginpahayag ni Castañeda nga naga-agi sa nagkalain-lain nga inspection ang mga baboy nga gina-ihaw sa slaughterhouse antes ibaligya sa merkado ang karne.
Panugyan sang natungdan sa mga konsumidor, magbakal sa mga stall ukon outlet nga may yara sang meat certificates agud nga masiguro nga hilway sa African Swine Fever ang meat products.
