ILOILO CITY – Nagapasalamat ang Local Economic Enterprise Office sa ginpatigayon nga Committee Hearing kaina sang aga agud nga istoryahan ang problema sang market vendors tuhoy sa mga talipapa.
Sa interview sang Bombo Radyo kay Local Economic Enterprise Office Head Ariel Castañeda, iya ginpahayag nga ang nasambit nga pagsinapol ang ginpangunahan ni Iloilo City Councilor Ely Estante, chairman sang Committee on Market and Slaughterhouse.
Suno kay Castañeda, ang nasambit nga pagsinapol ang gintambungan man sang mga market vendor kag mga barangay official sang mga lugar nga natumod nga may yara sang madamo nga talipapa.
Ginpahayag ni Castañeda nga sa pagsinapol, ginplastar ang mga plano nga dapat sundon ilabi na sang mga talipapa vendor agud nga masiguro nga matinlo ang mga pagkaon kag produkto nga ginabaligya agud nga malikawan ang balati-an ilabi na subong nga may yara sang Novel Coronavirus sa pungsod.
May kaangtanan diri, ginpahayag sang natungdan nga mahimo nga magpatawag pa liwat sang Committee Hearing agud nga mahitso ang ginareklamo sang market vendors nga nangin kakompitensya na nila ang mga nagabaligya sa talipapa.
