ILOILO CITY– Pagub-on na sang Local Economic Enterprise Office, ang mga estruktura sa sulod sang Iloilo Terminal Market nga ginagamit bilang sex den sa diin imbulbado ang mga menor de edad.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga ila na gub-on ang mga ginatukod nga extension nga nagaserbe kwarto agud himuon ang imoralidad.
Suno kay Castañeda, wala ginapahanugutan ang paghimo sang kun ano man nga sahi sang imoralidad sa sulod sang mga pampubliko nga merkado sa syudad sang Iloilo.
Pagahibaluon man nila kun bala nakahibalo ang mga tag-iya sang pwesto sa nagakatabo nga imoralida, kag sa tion nga may ideya ang mga ini kag wala sang ginhimo nga tikang, ila irekomenda ang pagpasarado sang nasambit nga pwesto.
Nagahingyo man siya sa mga ginikanan nga bantayan sang maayo ang ila mga kabataan.
Nahibaluan nga isa ka agi ang nagaserbe nga bugaw sa mga menor de edad sa diin sa balor nga 200 pesos mahimo na makarenta sang kwarto kaupod ang menor de edad.
