Ginkondenar sang legal counsel ni Anne Curtis ang mga ginbuy-an nga mga pahayag ni Congressman Bong Suntay nahanungod sa aktres kadungan sang ila committee hearing sa Kamara.
Ginlaragway sang abogado nga ”inappropriate ukon unacceptable” ang pahayag ni Suntay kaangot sa iya desire kag imagination sang nakita sini si Anne.
Suno sa sulat nga ginpadala sang legal counsel ni Anne, ang pagdalahig sa pangalan sang aktres nagapakita lamang sang isa ka indi manami kag wala nagakaangay nga topiko sa hearing sang Kongreso.
Gindugang pa sang kampo sang aktres nga ang amo sini nga mga pahayag nagapakanubo sang dignidad sang kababa-inhan kag wala ini lugar sa bisan ano nga forum, ilabi na sa Kongreso kun sa diin ginapaabot ang mga opisyal magpakita sang respeto.
Ginpahanumdom man sang legal counsel ni Anne ang importansya sang pag-promote sang pagrespeto kag dignidad sang kababa-inhan, nga ginakilala nga layi sang Pilipinas kaangay sang Safe Spaces Act kag Magna Carta of Women.
Samtang, nagreact man ang manghod ni Anne nga si Jasmine Curtis-Smith kag ang ila iloy batok sa ginbuy-an nga komento, samtang madamo man nga celebrities ang nagpahayag sang ila pagkadismaya sa social media.
Sa pihak nga bahin, nagpangayo man sang pasaylo ang asawa sang mamalidha nga si Sheila Guevara Suntay kay Anne kag sa iya pamilya, kag nagpahayag nga wala sang babayi nga dapat hambalan sang kaangay nga mga tinaga.
Nagpangabay man ini sa publiko nga indi pagdalahigon ang iya mga kabatan bangud wala ang mga ini sang ihibalo sa nabuhat nga sala sang ila amay.
