Gintawag nga patalang lamang sang legal counsel ni Dave Sarrosa nga si Atty. Rene Estopacio ang ginhatag nga pasalig sang Ayala Land Inc. sa mga pumuluyo sang Sicogon Island.
Ini nahanungod sa livelihood program nga ginpromisa sang korporasyon bilang kabahin sang pag-develop sang isla.
Suno kay Atty. Estopacio, nagpasugot lamang ang mga pumuluyo sa plano nga i-transform ang Sicogon bilang isa ka eco-tourism destination sadto.
Apang, suno sa iya, wala natigayon ang amo nga livelihood program gane ang pumuluyo sa karon ang nagakabudlayan bangud wala ang mga ini sang palangabuhian.
Maathag suno sa iya nga ginpasalig lamang ang pumuluyo ilabi na si Sarrosa nga may matabo nga pagbag-o sa ila nga isla, apang sa madugay nga tyempo wala ini matuman.
Sa matandaan nga nangin kontrobersyal sadtong Hunyo 25 ang pag-turn-over ni Dave Sarrosa sa mga pasilidad sa Sicogon Island kun sa diin gintawag sini nga Land grabber ang Ayala Land Inc.
Nangin agresibo si Sarrosa sa iya nga aktwasyon, rason nga ginpasakaan ini sang kaso, upod ang apat sini ka mga bodyguards.
Lakip sa ginpasaka nga kaso amo ang illegal possession of firearms, serious illegal detention, attempted murder kag iban pa.
Gin-athag naman ni Atty. Estopacio nga ila lamang tinutuyo nga mahatagan sang hustisya ang mga pumuluyo sa nasambit nga isla bangud nagakinahanglan ang mga ini sang bulig.
Dugang pa sini, padayon ang ila panawagan nga mabalik sa mga natungdan ang ila ginapanag-iyahan nga sa subong naga-agwanta bangud sa promisa nga wala gintuman sang korporasyon.
