ILOILO CITY- Ginkwestiyon sang mga abogado ni Pastor Apollo Quiboloy ang timing sang pagpagwa sang US Federal Bureau of Investigation sang posters sang founder sang Kingdom of Jesus Christ (KOJC) kag iban pa nga wanted sa US bangud sa pila ka mga kaso kaangay sang sex trafficking, fraud and coercion, cash smuggling, kag money laundering.
Suno kay Atty. Ferdinand Topacio, legal counsel ni Quiboloy, ang nasambit nga charges batok kay Quiboloy kag ang pag-release sang FBI sang posters ang may katuyuan nga i-discredit si President Rodrigo Duterte kag ibutang sa alang-alang ang vice presidential bid ni Davao Mayor Sara Duterte, kag former senator kag presidential frontrunner Ferdinand “Bongbong” Marcos Jr.
Si Quiboloy ang kilala nga malapit kay Duterte kag nagaserbi nga spiritual adviser ni Duterte samtang ang tandem ni Sara kag Marcos amo naman ang ginaendorso ni Quiboloy.
Suno sa iya,ang charges batok kay Quiboloy ang nag-ulhot lang matapos naelihir si President Duterte sang 2016.
Pahayag ni Topacio, ginagamit sang US ang pagkamalapit sa isa kag isa nanday Pastor Quiboloy kag President Duterte agud gub-on ang presidente.
Dugang ni Topacio, tuyo lang sang FBI nga pakahuy-an ang pastor.
Matandaan nga gin-publish sang FBI ang posters ni Quiboloy kag sang iya associates nga sanday Teresita Dandan kag Helen Panilag, upod sa iban nga mga pugista gikan sa Mexico kag China.
Ginmando ang pag-aresto kay Quiboloy sang November 10, 2021, matapos nga sila ang gin-indict sang federal grand jury sa US District Court for the Central District of California, Santa Ana, California.
Sanday Quiboloy, Dandan, Panilag, kag anom ka iban pa ang gin- charge sang conspiracy sa pag- engage sa sex trafficking by force, fraud and coercion, sex trafficking of children, marriage fraud, fraud and misuse of visas, bulk cash smuggling, promotional money laundering, concealment money laundering, kag international promotional money laundering.
