Ginplastar sang isa ka legal expert nga ang mga alegasyon kag dokumento nga ginbuyagyag ni former Senator Antonio Trillanes IV ang indi mahimo nga mangin basehan sang impeachment court kon indi ini pormal nga ipresentar kag mapamatud-an bilang ebidensya sa korte.
Sa interview sang Bombo Radyo kay Atty. Dan Cartagena, iya ginpahayag nga ang mga ginapahayag sa gwa sang korte indi pareho sang testimony nga ginahatag sa sulod sang courtroom, ilabi na kon wala ini ginpresentar under oath kag wala nahatagan sang kahigayunan ang pihak nga mag-cross-examine sa nagahatag sang impormasyon.
Ginpabug-atan man niya nga ang cross-examination amo ang isa sa importante nga proseso sa korte agud ma-usisa ang credibility kag kamatuoran sang testimony.
Suno sa iya, kon ang isa ka alegasyon ukon impormasyon wala naga-agi sa amo nga proseso, mahimo lamang ini nga mangin hearsay kag indi dayon magamit bilang basehan sang desisyon.
Ginklaro man ni Atty. Cartagena nga ang prosecution panel ang may katungdanan sa pagpili sang ila mga witnesses kag indi ang korte ang nagadesisyon kon sin-o ang dapat nila nga iga-presentar.
Pahayag pa niya, importante man nga ma-authenticate ang mga dokumento antes ini mahimo nga mangin kabahin sang ebidensya sa korte.
Dugang pa ni Atty. Cartagena, ang desisyon sang korte wala nagabase lamang sa kon ano ang ginkabig nga kamatuoran ukon kon ano ang posible nga matuod, kundi sa mga ebidensya nga ginpresentar kag napamatud-an sa korte.
Ini bangud, suno sa iya, bisan pa matuod ang isa ka impormasyon, kon wala ini napresentar bilang ebidensya kag wala naga-agi sa nagakaigo nga proseso, indi ini mahimo nga mangin basihan sang korte sa paghimo sang pinal nga desisyon.
