Nagpahanumdom ang isa ka legal experts sa mga ginikanan nga mangin mahainalungon kag mag-aligmat sa pagtugot sang ila mga kabataan nga menor de edad sa pagpagamit sang cellphone ukon social media.
Ini ang may kaangtanan sa kaso sang Australian national nga si Martin Cook nga gin-convict sang Supreme Court (SC) sa kaso nga qualified human trafficking bangud sa sexual exploitation batok sa apat (4) ka mga menor de edad nga iya nabiktima paagi sa social media, kun sa diin gin-sentensyahan si Cook sang Lifetime imprisonment kag multa nga P2 Million, amo man ang tag P600,000 nga danyos sa kada biktima.
Sa interview sang Bombo Radyo kay Atty. Chelna Deblois, iya ginpahayag nga nagakadapat gid nga sikyarun sang mga ginikanan kun sin-o ang mga makaistorya sang ila kabataan sa social media man ukon sa ila mismo nga kumunidad.
Dugang pa sini nga nagakadapat nga may giya sang ginikanan ang paggamit sang cellphone agud nga may ihibalo ang mga ini kag malikawan nga mangin biktima sang mga tawo nga may malain nga tuyo kag indi na masulit ang sahi nga insidente nga pagpang-abuso sexual sa mga menor de edad nga Pilipino.
