Ginpatpat sang isa ka human rights lawyer nga indi nagakahulugan nga hilway na nga naabswelto si Vice President Sara Duterte sa iya accountability matapos ang pag-withdraw sang tatlo ka grounds for impeachment batuk sa iya.
Sa interview sang Bombo Radyo kay Atty. Jobert Pahilga, iya ginpahayag nga bisan indi na pagadesisyunan sang impeachment court ang mga gin-withdraw nga alegasyon, mahimo gihapon nga mapasakaan ang bise presidente sang separado nga criminal ukon civil cases kon may igo nga ebidensya.
Lakip sa posible nga kaso ang misdeclaration ukon indi pagdeklarar sang assets kag ill-gotten wealth.
Suno kay Atty. Pahilga, mahimo man gihapon nga magpasaka sang kaso ang Office of the Ombudsman sa Sandiganbayan, lakip ang forfeiture sang mga properties ukon assets kon mapamatud-an nga wala ini nagasanto sa lehitimo nga ginhalinan sang income.
Pahayag pa niya nga matandaan nga may pending criminal case man si Duterte sa Regional Trial Court sang Quezon City parte sa alegasyon sang grave threat.
Ginpaathag man sang abogado, bisan indi na kinahanglan sang depensa nga magpresentar sang kontra-ebidensya sa mga gin-withdraw nga alegasyon, mahimo gihapon nila ini himuon agud masabat ang mga akusasyon nga nabatian na sang publiko.
Dugang pa niya, may napulo ka adlaw ang prosecution para sa formal offer of evidence, kag pagkatapos sini, mahimo naman magpresentar ang depensa sang ila kontra-ebidensya, kon may ara.
