Ginpunto sang isa ka Bombo Abogado ang kapaslawan sang legal team ni Senator Rodante Marcoleta kun ngaa daw madutlan gid ini sang plunder complaint nga ipasaka sang Ombudsman sa Sandiganbayan.
Sa interview sang Bombo Radyo kay Atty. Noel Palomado, iya ginpahayag nga sa una pa lang, wala nakit-an gilayon sang iya kampo ang ginhimo niya nga pag-ako nga nagbaton siya sadto sang ₱75 milyong campaign donations sang 2025 elections.
Base sa imbestigasyon sang Ombudsman nga ang mga donasyon ang wala nadeklarar sa iya Statement of Contributions and Expenditures (SOCE) kag sa Statement of Assets, Liabilities and Net Worth (SALN).
Suno kay Palomado, ini nga pag-ako ang nagamit gid batok sa senador.
Pahayag niya, kaangay nga gintiro ni Marcoleta ang iya tiil rason nga indi na ini makapalagyo sa kaso.
Apang pahayag niya, malawig man ini nga proseso kag indi man madali-dali preso si Marcoleta.
Ginplastar naman ni Palomado nga may remedyo pa ang kampo ni Marcoleta.
Suno sa Bombo Abogado, pwede siya mag-file sang Motion for Reconsideration ukon magdirekta sa Korte Suprema.
Isa pa ka remedyo-legal para sa senador amo ang pagbawi sang iya pahayag kag hambalon nga lango-lango lang ang pagsiling niyanga nagbaton siya sang tatlo ka campaign donations nga nagabalor ₱30 milyon, ₱25 milyon, kag ₱20 milyon.
Una na ginpanindugan ni Marcoleta nga lehitimo nga campaign donations ang mga ini kag gintawag ang complaint bilang isa ka paghingabot nga pahipuson siya sa iya posisyon bilang senador ilabi na sa iya imbestigasyon sa flood control scandal.
