Legarda, pa-imbestigaran ang ginaalegar network ni Epstein sa Pilipinas

Nagaplano si Senator Loren Legarda nga mag-file sang resolusyon agud nga imbestigaran ang ginapahayag nga “network” sa Pilipinas sang nagtaliwan na nga convicted American sex offender nga si Jeffrey Epstein.

Ini kasunod sang nagguwa nga report nga nag-hire si Epstein sang team nga naka-base diri sa pungsod sang 2010 agud nga mapanas sa iya nga pangalan ang mga kriminal niya nga mga buluhaton.

Gintabunan ang mga negative link sa internet, kag gin-promote naman ang mga positibo kaangot sa amo nga indibidwal.

Ginhimo ang madamo nga mga link sa mga websites kag sa pages online agud nga mapalapnag sa publiko nga involved si Epstein sa mga positibo nga aktibidad kaangay sa philanthropy, science, sports, kag iban pa.

Ginmuno naman ni Legarda ang iya plano nga resolusyon sa plenaryo sang nag-sponsor siya sa committee report sa Senate Bill 1819 ukon ang Expanded Anti-Online Sexual Abuse or Exploitation of Children (OSAEC) kag Anti-Child Sexual Abuse or Exploitation Materials (CSAEM) Act.

Suno kay Legarda, hingyuon nila sa Department of Justice kag sa National Bureau of Investigation partikular sa Committee on Women agud nga ma-imbestigaran ang amo nga ginapahayag network ni Epstein.

Importante nga mahibaluan kun sin-o ini suno kay Legarda, ilabi na nga wala man sila naga-operate bilang sex network kundi nagagamit sang front kaangay sang pagpakuno-kuno bilang negosyo ukon iban nga sector.

Hibaluon man suno kay Legarda ang posible nga mga organisasyon kag sindikato nga nagtrabaho kaupod kay Epstein.

Matandaan nga gin-release sang United States Department of Justice ang mga dokumento nga naga-unod sang minilyon nga internal records nga kaangot sa mga kriminal nga aktibidad sang amo nga sex offender.

Nabulgar nga naka-establisar sang relasyon si Epstein sa mga gamhanan nga mga indibidwal sa pulitika, sa negosyo, kag mga eskwelahan antes siya na-convict sang 2008 sa kaso nga prostitusyon.

Naaresto si Epstein sang 2019 bangud sa trafficking kag pag-abuso sa mga kabataan nga babaye sa US kag sa abroad, apang napatay siya sa presuhan samtang ginahulat ang trial.