Maga-upod ang opposition figures nga sanday Leila de Lima kag Chel Diokno sa prosecution panel sang Kamara sa impeachment trial ni Vice President Sara Duterte kasunod sang imbitasyon halin mismo kay House Speaker Martin Romualdez.
Suno sa house speaker, kilala ang duha sa pinakalagting nga mga indibidwal sa legal nga propesyon, kag ang ila nga pagkalakip sa prosekusyon ang makadugang sang kredibilidad kag balanse.
“Former Senator De Lima and Atty. Diokno are two of the most respected legal minds in the country. Their potential inclusion in the prosecution panel would add credibility, balance, and depth to this constitutionally mandated process,” pahayag ni Romualdez.
Lunsay naman nagpaguwa sang statement ang kampo nanday Congresswoman-elect De Lima kag Congressman-elect Diokno nga ginabaton nila ang tanyag ni Romualdez.
Suno kay De Lima nga kilala sa pagpakigbato para sa tawhanon nga kinamatarong, nagapanindugan siya para sa kamatuoran kag para mapasabat ang may salabton, kag magapabilin ini nga commitment bisan ano man ang political affiliation.
“My decision comes from a place of duty and principle. I have always stood for truth, accountability, and the rule of law — across different administrations, regardless of political affiliation. That commitment remains unchanged,” pahayag sini.
Nahibaluan nga si De Lima amo ang first nominee sang Mamamayang Liberal (ML) nga ginalantaw nga makakuha sang isa ka pwesto sa Kongreso.
Nagpaguwa naman sang statement ang Akbayan partylist nga bug-os nga ila suporta sa ila first nominee nga si Diokno nga mangin kabahin sang panel. Ang Akbayan naman amo ang una nga grupo sa party-list race subong nga eleksyon.
“As the principal endorser of the first impeachment complaint and after thorough party deliberations, we extend our full support to this historic process of accountability. Incoming Akbayan Rep. Atty. Chel Diokno will join the House prosecution panel,” suno sa partylist.
Natabo ang pag-imbitar kanday De Lima kag Diokno matapos nga wala nagdaog sa ila reelection bid ang duha sa 11 kag House prosecutors nga una na nga ginpakilala sang Kamara sang Pebrero. Ini amo sanday Ako Bicol Representative Jil Bongalon kag General Santos City Representative Loreto Acharon.
Sa interview naman sang Bombo Radyo kay Iloilo Third District Rep. Lorenz Defensor nga myembro man sang prosecution team, iya ginpahayag nga daku nga kadulaan sa team sanday Bongalon kag Acharon, apang kumpyansa man siya sa abilidad nanday De Lima kag Diokno.
“Sila ay mahuhusay na litigators, at kung willing silang tumulong sa impeachment, makakatulong sila sa pagpresenta nang maayos ng aming mga ebidensya,” suno kay Defensor.
Suno pa sa iya, ang pinaka-importante amo nga mabatian sang mga Pilipino ang kaundan sang ebidensya sang prosecution amo man ang depensa sang bise-presidente. Importante man suno sa iya nga mabaton ang desisyon sang senator-judges.
Hulyo 30 ginalauman nga maga-umpisa ang impeachment trial batok kay Duterte sa senado kasunod sang opisyal nga mga preparasyon sa pagbalik sang session sa Kongreso sa Hunyo 2.
