Gin-athag sang isa ka abogado nga mahimo nga magamit sang isa ka indibidwal ang ‘Lemon Law’ kon ang brand new nga salakyan nga ginbakal sini ang may depekto ukon guba.
Sa interview sang Bombo Radyo kay Atty. Domingo Oso, Jr., Bombo Abogado, iya ginpahayag nga ang Lemon Law ukon ang Republic Act No. 10642 ang isa ka layi nga nagahatag sang proteksyon kag kinamatarong sa mga consumers nga nagabakal sang brand new vehicles.
Suno kay Oso, gintawag ini nga Lemon Law bangud kon matumod nga may guba ang imo brand new nga salakyan daw kaangay nga nagainom ka sang lemon nga wala sang sabor ukon mapait.
Gintumod man sini nga mas pabor ang layi para sa mga konsumidor kon ikumpara sa mga manufacturers kag suppliers sang salakyan.
Isa man ini ka remedyo agud nga magamit ang kinamatarong sang isa ka consumer batok sa manufacturers sang mga salakyan.
