Nagkampeon sa Vocal Solo – Kundiman Category sa 12th Philippine Association of State Universities and Colleges (PASUC) NCAF 2026 ang estudyante nagikan sa West Visayas State University-La Paz, Iloilo City.
Ini amo si Leobert Vincent Delariarte isa ka fourth year student sang College of Communication nga nagrepresentar sang Region 6 sa ginpatigayon nga kompetisyon sa WVSU-La Paz campus.
Sa interview sang Bombo Radyo kay Delariarte, iya ginpahayag nga dako ang bulig sang disiplina sa paghalong sang iya tingog kag sa paglikaw sang mga butang nga mahimo makahatag sang distraction sa iya performance sa kompetisyon.
Suno pa sa iya nga ang iya nga paghimakas, pag-apresyar, kag pagpasalamat sa talento nga ginhatag sang Diyos amo ang naghatag sa iya sang kusog agud magpadayon.
Dugang pa sini nga nangin posible ang iya kadalag-an bangud man sa padayon nga suporta kag giya sang iya coach nga si Ronie Libutaque.
Sa pihak sang iya kadalag-an bilang nag-representar sang Region 6 sa kompetisyon iya ginpahayag nga dako ang pagpasalamat sang iya tagipusuon sa Ginoo sa paggiya kag paghatag sa iya sang talento kag kahigayunan nga magdaog sa amo nga kompetisyon.
