Padayon pa sa pagsaka ang numero sang kaso sang leptospirosis sa probinsya sang Iloilo.
Sa pinakaulihi nga rekord sang Iloilo Provincial Health Office (IPHO), may 139 na ka kaso sang amo nga balatian sa probinsya.
Anum naman subong ang napatay matapos nga nagdugang ang isa ka casualty nga tricycle driver sa Calinog, Iloilo.
Sa interview sang Bombo Radyo kay Iloilo Provincial Health Officer Dr. Maria Socorro Quiñon, iya ginpahayag nga ginahibalo pa sang Iloilo Provincial Epidemiology and Surveillance Unit kun sa diin nakuha sang driver ang amo nga balatian.
Ang lima ka iban pa nga napatay ang lunsay mga mangunguma halin sa Cabatuan, Leon, Badiangan, Carles, kag Balasan.
Mas mataas ang 139 ka kaso halin Enero 1 tubtub Agusto 12 subong nga tuig ipaanggid sa 74 ka kaso kag lima nga patay nga na-rekord sang probinsya sa kaangay man nga period sang nagligad nga tuig.
Padayon ang panawagan sang opisina sa publiko nga magsuksok gid sang botas kun maglusong sa tubig-baha. Kun ma-expose sa mahigko nga tubig, gina-abisuhan gid ang publiko nga magpalapit sa health centers para sa prophylaxis.
Ginapanugyan man nga magpakonsulta sa doktor kun may hilanat, palanakit sang mga kaunuran, palamula sang mata, pangpalangurog, kag kun nagabatyag sang tuman nga kasakit sang ulo. #
