Ginhangkat man sang madamo nga pagtilaw bangud sa bag o lang sini nadiskobrehan nga sakit sa iya kidney nga Stage 5 Chronic Kidney Disease, wala sa gihapon nadulaan sang paglaom ang isa ka graduate sang Iloilo Science and Technology University sa pagtuman sang iya handom nga mangin isa ka maestro matapos nga makapasar sa ginpatigayon nga Licensure Examination for Teachers sang nagligad nga Marso 2026.
Ini amo si Nikko Kent Andrei Sernicula nga tumandok sang Brgy. Roma, San Joaquin, Iloilo.
Sa interview sang Bombo Radyo kay Sernicula, iya ginsaysay ang mga hitabo sa iya kabuhi nga suno pa sa iya wala gid niya gin-ekspektar nga matabo bangud wala man ini sang bisan ano nga sintomas nga nabatyagan.
Suno pa sa iya, antes ini mag-review agud magkuha sang Licensure Examination, amo man ang tion nga iya nahibaluan nga nagasuprer na sya sang Stage 5 Chronic Kidney Disease.
Pahayag sini nga tuman kabudlay ang iya ginpang-agyan kaangay na lang sa pagkadula sang iya panan-awan kag pagpaidalom sini sa Dialysis.
Apisar sa madulom nga pagpanghangkat sa iya kabuhi nangin kasanag naman sini ang mga tawo sa iya palibot nga nangin inspirasyon man niya agud nga magpadayon.
Suno pa kay Sernicula nga nangin possible para sa iya nga matuman ang iya handom bangud man sa iya paghimakas, pagtuo kag paglaom nga mangin maayo liwat ang tanan para sa iya.
Dako naman ang iya pagpasalamat sa mga tawo nga nagbulig, nagsuporta kag nagpalangga pa gid sa iya sa tion sang kabudlayan sa iya kabuhi kaangay sang iya pamilya, abyan, kag sa iya girlfriend.
Dugang pa ni Sernicula nga wala gid ini magpati nga matalampuwasan niya ang isa sa pinakamabudlay nga parte sang iya kabuhi apang wala gid nagpabaya ang Diyos sa paghatag sang iya mga kinahanglanon.
