La Paz, Iloilo City – Indi lang kilala bilang topnotchers sa nursing licensure examination, maski man sa patag sang pageantry, nagapangibabaw man ang mga produkto sang College of Nursing sang West Visayas State University.
Ini matapos nga ginkoronahan ang third year nursing students nga sanday Rasheed Jared Royo kag Charisse Gabrielle Agraviador bilang Mr. and Ms WVSU 2023 sa coronation night nga ginpatigayon sang Enero 27.
Sanday Royo kag Agraviador amo ang magatungod sang papel bilang ambassador kag ambassadress sang unibersidad.
Sa interview sang Bombo Radyo kay Rasheed Jared Royo, iya ginpahayag nga dako gid nga bulig ang iya eksperyensya bilang isa ka student leader kag aktibo sa mga extracurricular activities sa pagdugang sang kumpyansa sini sa kaugalingon.
Sa subong, regalo niya sa kaugalingon ang pahuway bilang pagpanghanda sa palaabuton nga clinical duties bilang student nurse.
Samtang, ini naman ang labing una nga tion nga nag-intra sa isa ka dako kag prestihiyoso nga kumpetisyon si Charisse Gabrielle Agraviador.
Suno kay Agraviador, nagdako ini nga mahuluyaon kag ang pag-intra sa pageant ang ginakabig niya nga dako nga kahigayunan agud makagwa sa comfort zone.
Dugang pa sang natungdan, wala pa ini sang plano nga mag-intra sa iban nga pageant bangud naka-focus ini sa paggradwar sa kolehiyo kag makapasar sa Nurse Licensure Examination.
Sa subong, pahuway ang regalo sang duha sa kaugalingon matapos ang tanan nga preparasyon sa pageant.
