Iloilo – Magaduso and local government unit sang Carles, Iloilo sang programa agud mabuligan ang ang illegal fishers nga nadulaan sang trabaho.
Ini matapos nga gintukod ang Inter-Agency Task Force batok sa illegal, unreported, kag unregulated fishing sa nasambit nga banwa nga mahimo nga magapatrolya sa kadagatan.
Sa interview sang Bombo Radyo kay Carles Mayor Siegfredo Betita, iya ginpahayag nga hatagan sang ayuda ang mga iligal nga manugpangisda bangud nakahibalo ini nga kun mapabay-an ang mga illegal fishers, magutom ini kag ang ila pamilya.
Suno sa alkalde, magahingyo ini sang bulig sa mga ahensya sang gobyerno agud mabuligan nga mabag-o ang palangabuhian sang mga ini.
Ginpahayag sang natungdan nga obrahan ini sang gear swapping kun sa diin, sa baylo nga palupok ang gamiton, islan ini sang mga fishing gears nga nagasunod sa insakto nga pagsulundan.
Dugang diri, sa mga iban nga indi luyag magbalik sa pangpangisda, mahimo ang mga ini nga magsulod sa training workshops sang Technical Education and Skills Development Authority.
Sa subong, nakit-an na sang alkalde ang mga development kun sa diin amat-amat na nga naga-untat ang mga illegal fishers sa banwa.
