Dako ang responsibilidad sang mga Local Government Units (LGU) kag Barangay Officials sa pagbantay sa mga pumuluyo kun nagasunod sa health protocols subong nga adlaw sa kapistahan ni St. John the Baptist.
Sa interview sang Commander Edison Diaz, Chief sang Philippine Coast Guard- Iloilo, iya ginpahayag nga napakig-angutan naman nila ang LGUs kag barangay officials kag ginapanugyanan nga hugot nga i-monitor ang mga coastal barangays.
Suno kay Diaz, nagakadapat nga sawayon ang mga tawo nga wala naga-obserba sang minimum health protocols.
Dugang pa sang natungdan, doble nga pagpaninguha ang kinahanglan subong bangud madasig nga maglaton ang virus kun may yara sang pagtililipon.
I-deploy subong nga adlaw ang mga pulis, katapo sang compliance team kag Public Safety and Transportation Management Office (PSTMO) sa nagkalain-lain nga bahin sang syudad sang Iloilo agud masiguro nga wala sang may nagapaligo sa dagat, pool ukon basyahanay sang tubig kadungan sang pista ni St. John the Baptist.
Sa interview sang Bombo Radyo kay Mr. Jeck Conlu, Spokesperson sang COVID-19 team sang syudad, iya ginpahayag nga kinahanglan paminsaron sang publiko nga may yara pa sang pandemya.
Ang ano man nga sahi sang pagtililipon suno kay Conlu ang ginadumilian.
Pahayag niya, ang sin-o man nga magalapas sa pagsulundan ang i-isyuhan sang citation ticket.
Nagapangayo man sang kooperasyon si Iloilo City Police Office (ICPO) Cirector PCol. Uldarico Garbanzos sa mga pumuluyo sang syudad agud nga indi na madugangan pa ang kaso sang COVID-19.
Suno kay Garbanzos, may yara man sang pagpatrolya nga patigayunon ang mga kapulisan ilabi na sa mga coastal barangays.
