Oton, Iloilo – Plano sang local government unit sang Oton, Iloilo nga ipalab-ot sa Iloilo City Government ang mga reports nga ila nabaton halin sa mga pumuluyo nga naapektuhan sang signal shutdown sang Enero 21 tubtob Enero 22, 2023 kadungan sang pagsaulog sang Dinagyang Festival 2023.
Matandaan nga sa advisory nga ginpaguwa ni Iloilo City Mayor Jerry Treñas, nakabutang nga “modified signal shutdown” lang ang ma-eksperyensyahan ukon may mga areas lang nga maapektuhan kadungan sang higlights sang Dinagyang.
Sa interview naman sang Bombo Radyo kay Oton, Iloilo Vice Mayor Neil Olivares, iya ginpahayag nga maga-file siya sang resolution nga iga-certify bilang “urgent” sa ila nga session sa Myerkules, Enero 25.
Suno kay Vice Mayor Olivares, indi naman kuntani kinahanglan pa ang signal shutdown bangud tuman naman ka hugot ang intelligence operations kag inspeksyon sa mga nagasulod sa syudad sang Iloilo.
Nahibaluan nga magluwas sa Oton, naka-eksperyensya man sang signal shutdown ang portion sang Tigbauan, Pavia, Leganes kag mangin sa probinsya sang Guimaras.
