BINGAWAN, ILOILO – Todo ang kampanya sang Local Government Unit (LGU) sang Bingawan, Iloilo sa pagtapna sang Dengue Hemorrhagic Fever.
Sa interview sang Bombo Radyo kay Mayor Mark Palabrica sang nasambit nga lugar, iya ginpahayag nga nag-upod ang LGU sang Bingawan sa ‘Do Day Kontra Dengue Drive’ nga ginaduso ni Iloilo Gov. Arthur ‘Toto’ Defensor Jr.
Suno kay Palabrica, bag-o pa man nag-umpisa ang pagpaninlo, iya na nga ginsapol ang tanan nga Punong Barangay agud nga ipahibalo sa publiko kun paano malikawan ang Dengue.
Sa pagkamatuod suno kay Palabrica, sang tion sang tig-ilinit, nag-umpisa na ang tagsa ka barangay nga magpaninlo apang liwat naman nga nagduging ang lamok kadungan sang pag-umpisa sang tig-ululan.
Lakip sa mga ginatutukan nga pagalimpyuhan amo ang mga eskwelahan agud makalikaw sa Dengue ang mga estudyante.
