GUIMARAS – Ginatahod sang Local Government Unit sang Buenavista, Guimaras ang nangin pahayag ni Mayor Jerry Treñas may kaangtanan sa istrikto nga border restrictions sa tunga sang syudad sang Iloilo kag sang probinsya sang Guimaras.
Sa interview sang Bombo Radyo kay Mayor Eugene Reyes, iya ginpahayag nga sa bahin sang Guimaras Provincial Government, ang outbound pass lang ang ginahatag sa mga residente nga nagapadulong sa syudad sang Iloilo.
Suno kay Reyes, luyag niya nga athagon sa alkalde kun ano nga sahi sang quarantine pass ang kinahanglan antes makatabok sa syudad ilabi pa nga isa ang Buenavista wharf sa masako nga pantalan sa Guimaras.
Sa banwa naman sang Buenavista, istrikto nga ginapatuman ang protocol kasubong sang social distancing ilabi na kun byahe sang pampubliko nga salakyan ang pagahambalan.
Nahibalu-an nga umpisa buwas nga adlaw, Mayo 16, ipaidalom na sa General Community Quarantine ang Guimaras.
