ILOILO CITY–Plano sang Local Government Unit (LGU) sang Calinog, Iloilo nga magdeklarar sang State of Emergency bangud sa Hepatitis A outbreak.
Sa interview sang Bombo Radyo, ginpahayag ni Dr. Cesar Mestidio, Municipal Health Officer sang Calinog, Iloilo, nga naglab-ot na sa 102 ang kaso sang Hepa A sa ila lugar.
Kalabanan sa mga biktima ang estudyante sang Esteban S. Javellana National High School nga nahamtang sa Brgy. Guiso sa nasambit nga banwa.
Bangud sini, ang mga may Hepa A nga mga estudyante ang wala anay ginpa-eskwela agud nga indi malatnan ang iban pa nga estudyante.
May kaangtanan diri, tuyo sang LGU suno kay Mestidio nga ideklarar ang State of Emergency agud nga makuha ang 5% budget sang Disaster Risk Reduction Management Office.
Ang pondo ang pagagamiton sa pagpabulong sa mga biktima kag pagpatigayon sang mga programa agud nga matapna ang paglapta sang Hepa A.