DUMANGAS, ILOILO – Ginpasigurado sang Local Government Unit sang Dumangas, Iloilo kag sang Philippine Coast Guard nga yara sa maayo nga kahimtangan ang mga na stranded nga pasahero sa Roll On Roll Off Port sa Sition Naluuyan, Brgy. Sapao, Dumangas, Iloilo.
Sa interview sang Bombo Radyo kay Dumangas Mayor Ronaldo Golez, iya ginpahayag nga nangin tradisyon na nga sa tion nga may ma stranded nga pasahero sa pantalan, gilayon nga nagapadala sang bulig ang banwa.
Suno kay Golez, lakip sa ila ginahatag amo ang pagkaon, medical assistance kag iban pa.
Ginpahayag sang alkalde nga dako ang katungdanan sang Local Government Unit bangud ang pantalan sang Dumangas ang naga-akomodar sang mga pasahero nga naghalin pa sa Manila, Caticlan, Negros kag Mindanao.
Samtang, suno naman kay PO1st Romulo Sancio, sub station commander sang Philippine Coast Guard – Dumangas, indi lang ang mga personnel sang Philippine Coast Guard ang nagabantaty sa pantalan kundi mangin ang Philippine National Police ang nagabulig man.
Suno kay Sancio, madamo sang mga cargo nga yara sa pantalan kag dapat nga bantayan sang maayo.
Ginpasigurado man ni Sancio nga indi magutman ang masobra 200 ka mga na stranded nga pasahero.
