ILOILO – Welcome development para sa Local Government Unit (LGU) sang Dumangas, Iloilo ang unsolicited proposal sang isa ka pribado nga kumpaniya para sa expansion kag improvement sang roll-on roll-off (RORO) port sa nasambit nga banwa.
Sa exclusive interview sang Bombo Radyo kay Dumangas, Iloilo Mayor Ronaldo Golez, iya ginpahayag nga nagpasa na sang ila proposal sa pagpondo sang proyekto ang International Container Terminal Services Incorporated nga ginapanag-iyahan sang business magnate nga si Enrique Razon.
Suno kay Golez, dako ini nga bulig agud mas mapatin-ad kag mapadasig ang pagtransport sang mga produkto nga ginasakay sa mga barko ilabi na ang mga naghalin kag padulong sa luwas sang pungsod.
Ginpahayag sang alkade nga ila pa nga istoryahan ni Iloilo Governor Arthur Defensor Jr., ang natuhoy sa nasambit nga proposal sa diin ginapanan-aw nga mangin international port ang nasambit nga pantalan.
Naistoryahan naman nanday Philippine Ports Authority (PPA) manager Eduardo Goles kag ni Defensor ang natuhoy sa plano sa diin positibo ang reaksyon sang gobernador.
Diri kag ginhingyo sang PPA sa Provincial Development Council (PDC) nga ginapamunuan sang gobernador ang endorsement para sa proyekto agud maaprubahan na sang National Economic and Development Authority (NEDA).
Nahibaluan nga 12 tubtub 13 billion pesos ang pondo para sa tukuron nga proyekto sa diin ini ang tungaon para sa Iloilo City kag Dumangas Port.
