DUMANGAS, ILOILO – Sundon sang Local Government Unit sang Dumangas, Iloilo ang mandu ni Governor Arthur “Toto” Defensor Jr., tuhoy sa pagdumili sang smuggled meat products nga ginapaagi sa Dumangas Port.
Ini ang may kaangtanan sa lihok sang Iloilo Provincial Government nga matapna ang paglapta sang African Swine Fever.
Sa interview sang Bombo Radyo kay Mayor Ronaldo Golez sang nasambit nga banwa, iya ginpahayag nga bag-o pa man nagpaguwa sang executive order si Gov. Defensor, iya na nga nasapol ang tagdumalahan sang Dumangas Port kag ang Task Force nga amo ang natuon sa monitoring sang tanan nga goods nga ginapaagi sa nasambit nga pantalan.
Suno kay Golez, wala pa siya sang may nabaton nga kopya sang nasambit nga executive order apang iya ginpasigurado nga sundon ang mandu sang gobernador.
Ginpahayag ni Golez nga magabulig ang Local Government Unit sang Dumangas agud nga indi makalab-ot sa Iloilo ang kontaminado nga meat products.
Sa subong suno sa natungdan, usisaon gid sang Task Force kun bala may yara sang permit ang goods nga ginapaagi sa Dumangas Port.
