GUIMARAS – Padayun nga ginatutukan sang Local Government Unit sang Guimaras ang problema sa Roro Wharf sa diin indi organisado ang sistema.
Sa interview sang Bombo Radyo kay Guimaras Vice Governor John Edward Gando, iya ginpahayag nga personal siya nga nagkadto sa Roro wharf kag didto niya nakit-an ang miserable nga sitwasyon sang mga pasahero.
Suno kay Gando padayun, man ang ila monitoring agud mahatagan sang solusyon ang mga problema nga ila ginapangatubang lakip na ang pagplastar sang sistema sa roro wharf.
Isa sa problema suno kay Gando amo ang kakulang sang vessel nga nagabyahe sa Guimaras rason nga sila ang magapakig-angot sa Maritime Industry Authority sa kun ano ang pwede mahimo.
Magapakig-istorya man suno kay Gando si Guimaras Congresswoman Lucille Nava kay House Speaker Alan Peter Cayetano tuhoy sa problema sang probinsya sang Guimaras lakip na ang paghinun-anon kay Department of Transportation Secretary Arthur Tugade sa liwat nga pagreview sasng rekomendasyon sang Maritime Industry Authority sa kanselasyon sang certificate of public convenience sang mga pumpboat.
Pagatawgon man nila suno kay Gando ang atensyon ang Department of Sicial Welfare and Development Regional kag Cenral Office may kaangtanan salivelihood program nga mahatag para sa mga crew, kag porters sang mga pupboat nga apektado sa pagpa-untat sang byahe.
Sa subong suno sa natungdan ang FF Cruz, montenegro,ocean jet kag fastcat ang nagabyahe sa Guimaras samtang sa maabot nga myerkules ginalauman nga makabyahe man ang tatlo ka dugang nga mga vessels agud mahagan-hagan ang kabudlay sang mga pumuluyo.
