IGBARAS, ILOILO– Ginahulat pa sang Local Government Unit sang Igbaras ang una nga 100 ka mga resulta sang swab test nga ila ginpatigayun, sa mga posible contacts sang isa ka pasyente sa ila banwa nga nagpositibo sa Coronavirus Disease 2019.
Sa interview sang Bombo Radyo kay Igbaras Mayor James Esmeralda, iya ginpahayag nga ginahulat pa nila sa subong ang resulta, sang mga una na ginpaidalom sa COVID-19 testing.
Suno kay Esmeralda, may yara pa sang masobra 100 ka mga nabilin nga inugpaidalom sa tests, apang temporaryo nila ini gin-untat, bangud sa ginapahayag problema sa sub -national laboratory sa Western Visayas Medical Center.
Nalakip suno sa iya sa mga ginpaidalom sa testing ang bug-os nga pamilya sang nagpositibo sa virus kag sa subong, naka-home lockdown ang mga ini.
May yara man sila sang 150 pa ka extra nga mga kits para sa testing, apang ang 20 ang ginreserba para sa mga repatriated OFW’s nga maga-abot sa ila banwa.
Suspendido pa sa subong suno kay Esmeralda ang serbisyo sa ila munisipyo, tubtob sa tion nga ma-establisar na sang maayo ang sitwasyon sang ila banwa.
Nagapangabay man ang natungdan nga kuntani, magsunod ang tanan nga pumuluyo sa mga health standards nga ginapatuman, kag likawan ang paggawa kun indi manlang kinahanglanon.
