𝗟𝗘𝗢𝗡, 𝗜𝗟𝗢𝗜𝗟𝗢 — Nagpasalig ang Local Government Unit (LGU) sang Leon, Iloilo nga magahatag sila sang bulig sa mga biktima sang insidente sang pagkahulog sang jeep sa Brgy. Cagay, Leon, Iloilo nga gintunaan sang kamatayon sang duha ka mga estudyante.
Ang mga napatay amo sanday Arvin Cabana, 14, kag ang hinablos sini nga si Princess Cabana, 6 ka tuig.
Ang driver naman amo si Yuben Cabansag, 41, lunsay mga residente sang nasambit nga lugar.
Sa interview sang Bombo Radyo kay Leon, Iloilo Mayor Ma. Lina C. Holipas, iya ginpahayag nga magapalab-ot sila sang bulig sa mga biktima sa nagluntad nga aksidente, kon sa diin, ginakasubo gid sang banwa ang pagtaliwan sang duha ka mga menor-de-edad.
Suno kay Holipas, matapos niya nga nabaton ang masubo nga balita, nagpadulong ini sa Rural Health Center sang banwa agud magkoordinar kag masekyar ang kahimtangan sang mga biktima.
Ginpahayag man sini nga maga-extend ang Local Government Unit sang financial assistance, apang sa subong, wala pa matumod kon pila gid ang ihatag kag gamiton nga pondo.
Gin-athag man sang alkalde nga may nabilin pa nga apat ka mga pasyente sa Aleosan District Hospital, samtang may duha naman ang yara sa ospital sa Iloilo City kag ginadapatan sang pagbulong.
Ang mga outpatient naman ang ginpangdul-ong sa ila nga puluy-an gamit ang mga pasilidad sang lokal nga pamunuan sang banwa.
Ginsaysay man sang natungdan nga on going ang widening project sang mga alagyan sa nabukid nga bahin sang Leon, Iloilo kon sa diin may porsyon nga nagakonektar sa banwa sang Tubungan.
Gin-ako man sini nga naga-umpisa pa lang ang pag construct sa amo nga dalan apang wala pa nakalab-ot sa Brgy. Cagay nga magakonektar sa Brgy. Aningalan, Antique.
