NEW LUCENA, ILOILO – Ginahulat na lang sang Local Government Unit sang New Lucena, Iloilo nga maaprobahan ang calamity fund agud nga ibakal sang bulong kag equipment sa pagpatay sang lamok nga nagadala sang Dengue Hemorrhagic Fever.
Ini ang kasunod sang deklarasyon nga ipaidalom sa Dengue outbreak ang probinsya sang Iloilo.
Sa interview sang Bombo Radyo kay Mayor Liecel Mondejar-Seville sang nasambit nga banwa, iya ginpahayag nga ila na nga ginahitso ang plano tuhoy sa paggasto sang pondo.
Ginpahayag ni Seville nga sa subong, nagapadayon ang kampanya sang Local Government Unit nga pagpaninlo sa palibot sa diin nagalab-ot sa 35 ang kaso sang Dengue sa New Lucena sa bulan lamang sang Hulyo.
Paagi sa calamity fund, magabakal sang bulong ang Local Government Unit agud nga gamiton sa pagpatay sang lamok.
Magabakal man sang mga testing kits kag Intravenous Fluids para sa mga Dengue patients nga yara sa New Lucena Polytechnic College Medical Clinic & Hospital.
Plano man sang Local Government Unit nga mag-hire sang dugang nga medical technologist nga amo ang nagaproseso sang medical results sang mga pasyente.
