PASSI CITY – Bugal para sa Local Government Unit sang Passi City nga liwat na naman nga makabaton sang Seal of Good Local Governance award gikan sa Department of Interior and Local Govenrment.
Sa interview sang Bombo Radyo kay Passi City Vice Mayor Jesry Palmares, iya ginpahayag nga ang Seal of Good Local Governance ang pinakamataas nga pasidungog nga nakuha sang Local Government Unit.
Suno kay Palmares, humalin sang 2011, nakabaton na sang Seal of Good Housekeeping ang Passi City apang nauntat lamang ini sang napatay si anay Department of Interior and Local Govenrment Sec. Jesse Robredo sang 2012.
Ginpahayag ni Palmares nga sang liwat na naman nga ginbuhi ang nasambit nga pasidungog kag gin-ilisan sang Seal of Good Local Governance, isa ang Passi City sa mga awardee.
Nagapakita lamang ini suno kay Palmares nga nagapanikasog ang mga opisyal agud nga mapauswag pa gid ang component city.
Samtang, mangin fully-operational na ang sanitary landfill sang Passi City umpisa sa masunod nga semana.
Suno kay Palmares, iya ginpahayag nga sa Oktubre 24 natalana ang groundbreaking ceremony sang nasambit nga sanitary landfill nga napahamtang sa Brgy. Aglalana.
Ginpahayag sang bise alkalde nga ang sanitary landfill ang mahimo nga habuyan sang basura indi lamang sang mga taga-Passi City kundi lakip man ang mga halin sa kaiping nga banwa.
Ang pagpatukod sang sanitary landfill suno sa natungdan ang isa ka lihok sang Local Government Unit sa pagsunod sa Clean Air Act.
