SAN JOAQUIN, ILOILO- Magadangop na sa korte ang Local Government sang San Joaquin, Iloilo agud liwat nga pahanugutan ang pagpatigayon sang pasungay nga isa sa mga highlights sa Pasungay Festival sang banwa.
Ini matapos nga ginpaiway sang duha na ka sunod-sunod nga tuig humalin sang 2019 ang pasungay ukon bullfighting bangud sa ginaalegar sang mga animal rights advocates nga isa ka sahi sang animal cruelty ang pasungay.
Sa interview sang Bombo Radyo kay Sangguniang Bayan member Joe Abad Lazaro sang San Joaquin, Iloilo, iya ginpahayag nga magapasaka sila sang petisyon sa korte.
Suno sa iya,indi sila mag-untat kun indi mabalik ang pagpatigayon sang pasungay.
Dugang sang natungdan, himuon nila ang tanan nga legal nga tikang kag kun mahingagaw, ila ini patigayunon sa Agusto kadungan sang kapiestahan sang banwa.
Nahibaluan nga subong nga adlaw kuntani patigayunon ang pasungay kadungan sang Pasungay Festival 2020.
