ILOILO CITY–Nagpaathag ang Local Government Unit (LGU) sang San Joaquin, Iloilo sang mga rasun sa pagpasugot nga untaton ang Pasungay subong nga tuig.
Sa interview sang Bombo Radyo kay SB member Joe Abad Lazaro Jr. ,  iya ginpahayag nga may yara sang tul-id nga rasun ang LGU sang banwa sa pagpasugot nga untaton ang kahiwatan bangud sa alegasyon nga ini ang nagalapas sa Animal Welfare Act.
Sa pagpaathag ni Abad, gin-pauntat ang pasungay bangud nga ang mga ini ang nagarespeto sa mga tawo nga indi kumbinsido sa nasambit nga kahiwatan.
Dugang pa ni Lazaro, nagahatag lang sang igtalupangod ang mga opisyal sang banwa sa kawsa sang mga nasambit nga tawo kag labaw sa tanan ginaproteksyunan lamang sang mga ini ang mga pumuluyo, pangalan kag imahe sang San Joaquin.
Nagpangayo man ang SB Member sang pasaylo sa mga nagkadto agud nga masaksihan kuntani ang pasungay ilabi na sa mga bisita halin sa mga kaiping nga kabanwahan kag mga turista halin sa nagkalain-lain nga bahin sang kalibutan.
Samtang, himuon sang LGU sang San Joaquin, Iloilo ang tanan nga ila masarangan agud nga mapabilin kag mapadayun ang pasungay nga isa na ka kultura sa nasambit nga banwa.
Suno kay Lazaro, ang pagpauntat sang Pasungay subong nga tuig ang temporaryo lamang kag wala ini nagakahulugan nga ini ang ipatunman man sa masunod nga tuig.
Tun-an pa sang LGU ang mga lihok kun ano ang nagakadapat nga himuon apang nagpasalig man si Lazaro sa mga pumuluyo sang ila banwa nga himuon nila ang tanan agud nga ipakigbato ang ila kultura.