STA. BARBARA, ILOILO – Nagapalab-ot sang pagpakig-unong ang Local Government Unit sang Sta. Barbara, Iloilo sa pamilya sang 52 anyos nga lalaki nga ika-15 nga casualty sang Coronavirus Disease 2019 (COVID-19) sa Western Visayas.
Santo sa Facebook post ni Mayor Rema Somo, umpisa sang Hulyo 1, gin-lockdown ang balay ni Patient no. 336 kasunod sang kumpirmasyon nga nagpositibo ini sa virus.
Sang Hulyo 18, nagpositibo sa COVID-19 ang duha sa 6 ka mga close contacts sang pasyente nga ginalakipan sang iya 49 anyos nga tiayon nga amo si Patient no. 724 kag ang 8 ka tuig nila nga bata nga amo si Patient no. 723 nga lunsay asymptomatic.
Ang iban nga family members lakip na ang duha ka kabulig sa balay ang nagnegatibo naman sa COVID-19 kag nagapaidalom sa home quarantine.
Ang 13 ka mga shop kag store helper sa Glass and Aluminum Supply nga ginapanag-iyahan sang napatay nga pasyente ang lunsay nakatapos na sang 14-day mandatory quarantine period kag wala nakitaan sang sintomas sang COVID-19.
