TUBUNGAN, ILOILO– Magahatag sang libre nga transportasyon ang Local Government Unit sang banwa sang Tubungan subong nga adlaw, para sa mga pumuluyo sang ila banwa nga may importante nga kinahanglanon, kaangay sang pagpadulong sa trabaho, pagbakal sang bulong, kag iban pa.
Ini matapos indi pa mahimo makabyahe ang transport group sang nasambit nga banwa, bangud wala nakakuha sang special permit nagikan sa Land Transportation Franchising and Regulatory Board.
Sa interview sang Bombo Radyo kay Tubungan Mayor Roquito Tacsagon, iya ginpahayag nga may yara sila sang ginhanda nga mga salakyan para sa mga pumuluyo, kag ini ang ginalakipan sang tatlo ka salakyan sang LGU, kag isa ka jeep nga gin-arkilahan sang Lokal nga pamunuan.
Suno kay Tacsagon, ang mga salakyan ang magadala sang mga pasahero halin sa banwa sang Tubungan, padulong sa Mohon Terminal vice versa, kag libre ini para sa tanan.
Para sa mga magasakay sa amo nga mga salakyan, kinahanglan nga nakaface mask ang mga pasahero, kag yara sang General Community Quarantine Pass, samtang may yara naman sang disinfectant ang mga salakyan para sa mga pasahero.
Sa tion nga magpauli suno sa alkalde, ang mga pasahero ang magahulat sang salakyan sa Mohon Terminal.
Samtang, gindugang man niya nga paga-updan niya ang pinuno sang transport group nga magpadulong sa talatapan sang LTFRB, agud makumpleto na ang kulang nga dokumento nga amo ang certification nga nagapamatuod nga ang asosasyon sang mga Jeep sa Tubungan, ang nagaproseso na sang pagconvert sang ila asosyasyon bilang isa ka Transport Cooperative.
Nagpanawagan man siya suno sa natungdan sang kooperasyon sang mga pumuluyo kag kun may yara sang reklamo, gilayun nga ipalab-ot sa iya talatapan, agud mahatagan sang nagakaigo nga solusyon.
