ILOILO CITY- Nagpabutyag sang pagkadismaya si Iloilo First District Rep. Janette Garin sa mga Local Government Units may kaangtanan sa pag-inagaway sa COVID-19 vaccine allocation sang gobyerno.
Sa interview sang Bombo Radyo kay Rep. Garin, iya ginpahayag nga magluwas sa agaway sa bakuna, masami man nga nagakatabo ang basulay ilabi na kon may makit-an nga diperensya ang pumuluyo sa mga tikang sang LGU may kaangtanan sa pandemya.
Suno sa mamalidha, sa baylo nga magbinasulay kag magpaindis-indis sa alokasyon sa bakuna, mas maayo nga panumdumon na lang sang kada isa kon paano makabulig agud nga matapna ang paglala sang sitwasyon kag magbuylog sa pagtinguha sang gobyerno nga mabatuan ang krisis nga ginapangatubang sang pungsod.
Dugang pa niya, sa subong nga may pandemya, mas maayo nga ipaiway man ang istorya nahanungod sa eleksyon kag politika bangud mas seryoso nga topiko ang COVID-19 pandemic.
