ILOILO – Kuntani nangin responsable man lang ang Business Process Outsourcing (BPO) company nga iQor sa pagpahibalo sa mga local government units sang nagpauli ang ila mga empleyado nga exposed sa COVID-19.
Ini ang pahayag ni Pavia Mayor Laurence Anthony “Luigi” Gorriceta matapos 14 sa nagdugang sa COVID-19 cases sa ila nga banwa ang lunsay nagikan sa iQor.
Sa interview sang Bombo Radyo kay Gorriceta, iya ginpahayag nga wala sang koordinasyon nga ginhimo ang amo nga call center sang ginpapauli nila ang ila nga empleyado matapos ginkuhaan sang swab sample.
Kinamatarong sang local government unit suno sa alkalde nga mahibaluan ang pag-abot sang amo nga mga COVID-19 suspects agud indi na mabudlay ang pagpatigayon sang contact tracing kun may magpositibo sa virus.
Apang ang natabo suno kay Gorriceta, ginpahibalo lang sila sang positibo na ang resulta sang test kag sila pa mismo sa Pavia ang nagpahibalo sa mga empleyado sang ila test results.
Sa subong, ginpa-home quarantine ang mga pamilya sang mga COVID-19 positive, samtang ang 14 naman ka mismo COVID-19 positive ang ginsaylo na sa isolation facility.
Wala man nagpakig-angot ang iQor sa banwa sang Pototan.
Sa interview sang Bombo Radyo kay Mayor Rafael Enrique Lazaro, iya ginpahayag nga may 6 ka taga-iQor sa ila banwa nga subong nagpositibo man sa COVID-19.
Gilayon nga ginpatigayon ang contact tracing kag as of August 12, kapin 20 na ka tawo ang natumod nga napalapitan sang mga COVID-19 positive nga call center agents.
Hugot man nga ginabantayan ang pamilya sang mga pasyente bilang pagsunod sa quarantine protocol matapos nga sila man ang ginpaidalom sa swab test.
