ILOILO CITY – Ginbawi na ni Iloilo City Councilor Plaridel Nava ang kaso nga libel nga iya ginpasaka batok kay Mayor Jed Patrick Mabilog.
Ginpahayag ni Nava sa interview sang Bombo Radyo Iloilo nga dapat na kalimtan ang mga nakaligad kag untatan ang pamulitika.
Sa interview sang Bombo Radyo Iloilo, ginpahayag ni Mayor Mabilog nga ginkalipay sini ang tikang ni Nava kag tiyempo na para magpatawad.
Ang kaso may kaangtanan sa nagguwa sadto nga white paper antes ang 2016 elections kun sa diin gina-akusaran ni Konsehal Nava nga miyembro sang isa ka crime syndicate.
Ang nasambit nga dokumento ang ginapahayag nga ginhatag ni Mabilog sa PNP agud imbestigaran si Nava.
Matapos ginbawi sang konsehal ang kaso, gin-athag naman sang alkalde nga temprano pa para istoryahan ang pulitika, ilabi na ang 2019 elections.
Ini kasunod sang mga ispekulasyon nga ang tikang ni Nava ang para sa ginaluto nga pag-updanay nila ni Mabilog sa isa ka partido sa sunod nga eleksyon.