Indi patas nga pagwaragwag kag libelous nga mga tinaga ang rason sang kampo ni former Guimaras governor kag lone district congressman JC Rahman Nava sa pagpasaka sang kaso nga online libel batok kay former radio broadcaster kag subong mayoral candidate Salvador ‘Jun’ Capulot.
Sa interview sang Bombo Radyo kay Atty. Hans Sayno, legal counsel ni Nava, iya ginpahayag nga sang nagatrabaho pa bilang radio broadcaster si Capulot, makapila ka beses sini ginlaslasan si Nava sa kahanginan, nga malantaw kag mabatian man sa social media.
Suno kay Sayno, indi fair comments ang ginpanghaboy ni Capulot batok kay Nava kag foul na ang ginpangbuy-an sini nga mga buyayaw.
Pahayag sang abogado, ini ang rason kun nga-a nagdesisyon si Nava nga pasakaan ang anay radio broadcaster sang nagakaigo nga kaso.
Dugang pa niya, madamo sang ‘professional media’ nga nakahibalo sang ila kinamatarong kag kinamatarong man sang iban.
Apang sa kaso ni Capulot suno sa natungdan, kasubong nga nagpinataka lang ini sang haboy sang mga tinaga nga nagatapak sang kinamatarong, integridad kag pagkatawo sang iban.
