Gindumog sang masobra 2 million ka mga tawo ang libre nga concert sang kilala nga pop star nga si Lady Gaga sa baybayon sang Copacabana sa Brazil.
Amo ini ang pinakamadamo nga audience sa bug-os nga karera ni Lady Gaga, kag ginpunduhan sang syudad bilang kabahin sang inisyatibo nga pagpasanyog liwat sang ekonomiya sang Brazil.
Ginalauman sang mga otoridad nga ang aktibidad makahatag sang ginabulubanta nga $100 million (₱5.7 billion) nga benepisyo sa lokal nga ekonomiya.
Ang nasambit nga performance ang kabahin sang promotional tour ni Lady Gaga para sa iya ikawalo nga album nga ginatawag “Mayhem,” nga nagalakip sang mga kanta nga “Abracadabra” kag “Die With a Smile.”
Madumduman nga ang ulihi niya nga pagperform sa Brazil sang tuig 2012.
Ginpahamtang ang hugot nga seguridad sa lugar, upod ang 5,000 ka mga kapulisan nga nagbantay.
Si Lady Gaga indi lang ang una nga artista nga nagtanyag sang libre nga concert sa Brazil.
Sang Mayo 2024, si Madonna man nagpatigayon sang libre nga concert sa amo man nga baybayon.
Nahibaluan nga nagbiyahe pa ang mga fans halin sa nagkalain-lain nga bahin sang pungsod agud lang masaksihan ang performance sang isa ka kilala nga pop superstar.
