Wifi here, wifi there, bisan diin may wifi connection.
Halos kalabanan man may yara sang wifi sa ila nga puluy-an.
Ini bangud tuman ka importante sa subong panahon ang Internet connection ukon wifi, para sa online class, online nga mga trabaho kag madamo pa.
Apang paano kung libre nalang ang wifi mo sa mosbra isa ka dekada? Mang-indi ka pa bala?
Ini ang natabo sa mag-asawa nga Swiss sang sila ang na-enganyo sa advertisement sang isa ka Swiss Internet provider nga ”TWIFI” nga naga-offer sang libre nga wifi sa sulod sang 18 ka-tuig.
Sa nasambit nga advertisement, ginahangkat ang mag-asawa nga pangalanan ang ila nga anak nga anggid sa pangalan sang kompaniya.
“Twifus” para sa mga baby boy kag “Twifia” naman kung baby girl ang i-pangalan sang mga mag-asawa sa ila bata nga ibun-ag kabaylo sang free wifi sa sulod sang 18 ka-tuig.
Gilayon naman nga nagpasugot ang mga ginikanan nga naga-edad 30 kag 35 kag gin-register sa birth certificate ang pangalan sang ila baby girl nga Twifia.
Manami man ang nasambit nga pangalan suno sa ila kag dako ang ila makinot nga kuwarta para sa pag-eskwela sang ila nga bata kung libre na ang ila nga wifi connection sa sulod sang 18 ka-tuig.
