Nagsugod na sang nagligad nga semana ang libre sakay para sa mga empleyado sang Iloilo City Hall bilang kabahin sang tikang sang administrasyon ni Mayor Raisa Treñas agud masiguro ang continuity sang public service, operational efficiency kag employee welfare para sa benepisyo sang publiko.
Anum ka City Hall buses ang gin-deploy para sa anum man ka nagkalain-lain nga ruta nga naga-serbisyo sa mga empleyado nga naga-commute pakadto kag pahalin sa City Hall.
Suno kay Joy Fantilaga-Gorzal, spokesperson ni Mayor Raisa Treñas, ang Libre Sakay ang ginpatuman agud masiguro nga maka-report sa oras ang mga empleyado nga naga-atubang adlaw-adlaw sang frontline services pareho sang pagproseso sang permits, paghatag sang public assistance, emergency response, kag iban pa nga importante nga operasyon sang syudad.
Ginpaathag man sang syudad nga may schedule lamang ang Libre Sakay kada Lunes kag Miyerkules agud indi maapektohan ang operasyon kag kita sang public transportation sector, ilabi na sang mga jeepney drivers.
Ang libre sakay naga-operate alas-6:15 tubtob alas-7:10 sang aga para sa morning trips samtang alas-5:30 naman sang hapon halin sa City Hall para sa pauli nga byahe.
Kinahanglan lamang magpresentar sang official ID ang mga empleyado agud maka-avail sang serbisyo sa designated pickup points.
Base sa survey sang Iloilo City Government, masobra sa 1,000 ka mga empleyado ang naga-commute kada adlaw pakadto sa City Hall.
Samtang ginapatuman ang ini nga programa, nagapadayon man ang fuel subsidy program sang siyudad para sa transport sector.
