ILOILO CITY–Patay ang lider sang Amazona Brigade nga si Mercedes “Ging-ging Nava” matapos gin-ambush sa Brgy. Calajunan, Mandurriao Iloilo City.
Papauli na sakay sa mitsubishi strada nga pick up si Nava sang natabo ang insidente.
Sa interview sang Bombo Radyo kay Sr./Insp. Marlon Valencia, hepe sang Mandurriao Police Station, iya ginpahayag nga ginbawian sang kabuhi ang biktima matapos gindala sa Western Visayas Medical Center.
Magluwas kay Nava, patay man ang iya kaupod sa salakyan nga si Erwin Fontillas, 41 anyos sang R Mapa St., Manduriao, Iloilo City.
Sa interview sang Bombo Radyo sa witness, iya ginpahayag nga nakasakay sa motorsiklo ang gunman nga nagluthang kay Nava.
Suno sa witness, nag-uli sang ginhulam sang kaha sang softdrinks ang mga biktima matapos ang ila kahiwatan sa distrito sang Manduriao.
Si Ging-Ging Nava ang pakaisa ni Iloilo City Councilor Plaridel Nava kag nangin kontrobersyal matapos ginbulgar ang anomaliya sa signature campaign batok sa Panay Electric Company (PECO) sang damlag lang.
Lakip sa mga gintumod niya nga utok sang pagpameke sang pirma amo sanday Dra. Gold Gonzales, Councilor Nava, Councilor Joshua Alim kag Presidential adviser for Western Visayas Jane Javellana.
Gina-usisa pa sang Scene of the Crime Operatives (SOCO) ang motibo sa pag-ambush-patay kanday Mercedes “Ging-ging” Nava kag kaupod nga si Erwin Fontillas sa Brgy. Calajunan, Mandurriao, Iloilo City.
Sa interview sang Bombo Radyo kay Police Superentendent Hilarion Roga, team leader sang SOCO, iya ginpahayag nga ila gamiton ang mga recoveries sa crime scene agud nga masolbar ang kaso.
Suno kay Roga, ginapahayag nga lima ang nakit-an nga basiyo sang bala sa salakyan sang mga biktima.
Sa subong, padayon pa ang pagtipon sang impormayson gikan sa mga witness.