ILOILO CITY – Pagtimalos kag kompetisyon sa negosyo sang iligal nga druga ang nakit-an nga motibo sang PNP Anti-Kidnapping Group sa pag-kidnap sa drug personality nga si Ronaldo Arguelles sa diin patay sa engkwentro ang lima ka mga suspek nga Ilonggo nga ginapahayag katapo sang Ricky Barrios Drug Syndicate Group.
Sa exclusive interview sang Bombo Radyo kay S/Supt. Glenn Dumlao, pinuno sang PNP Anti-Kidnapping Group (AKG), nagaguwa sa ila imbestigasyon nga may katapo sang grupo nanday Barrios nga ginpadakop kag ginpa-preso ni Arguelles.
Bangud sini, nakighimbon si Barrios sa amay sang iya anay live-in partner nga si Boyet Arguiles agud kidnapon ang drug personality.
Dugang pa ni Dumlao nga modus na sang grupo ni Barrios nga ipagawad ang ila gin-kidnap kabaylo ang kwarta ukon ransom kag kun indi makabayad, ang druga, ginapanag-iyahan nga mga propiedad kaangay sang duta, balay kag salakyan ang ginaparehistro sa pangalan sang karon karelasyon ni Barrios nga si Camille Luisiges, antes ibaligya.
Ini man ang rason suno kay Dumlao kun nga-a cash nga ginbayaran sang grupo sang sindikato ang P1.3 million nga balor balay sa Sto. Tomas, Batangas nga nagaserbe ila safe house.
Nahibaluan nga sa natabo nga engkuwentro sa tunga sang AKG kag grupo ni Barrios, napatay sanday Simplicio “Impi” Parreño sang Brgy. Dacal, San Enrique, Iloilo; Marcelo Sicam nga ginapahayag taga-Antique, kag tatlo ka iban pa nga natumod sa mga alyas nga “Bubot”, “Mut-mot” kag “Itik” nga ginpahayag lunsay taga-siyudad sang Passi, Iloilo.
Naaresto naman sa ginpatigayon nga follow-up operation sanday Glen Tancingco nga driver sang grupo, SPO2 Leo Leal Pamonag nga ginapahayag Ilonggo man nga active police nga naga-supply sang mga armas kag iban pa nga mga gamit sang sindikato, Camille Luisiges nga karelasyon sang mastermind nga si Ricky Barrios, kag ang utod niya nga si Lalaine Barrios nga amo ang caretaker sang safe house.
At large naman ang mga kahimbon sang mga suspek nga sanday Joshua Magbanua sang Passi City kag ang amay sang anay karelasyon ni Barrios nga si Boyet Arguiles.