Ginsentensyahan sang korte sa Kenya sang 200 ka tuig nga pagkapreso ang lider sang isa ka doomsday cult nga si Paul Mackenzie matapos mapamatud-an nga may salabton ini sa pagpatay sa 191 ka tawo.
Sa sini nga mga biktima, 190 ang kabataan.
Si Mackenzie kag 28 nga iban pa ang ginpamatbatan nga may salabton sa mga pagpatay bangud ginmanduan sini ang iya mga sumulunod nga pagutman ang ila mga kabataan tubtob nga mapatay, agud suno sa iya, makaabot sila kay Hesus.
Suno kay Justice Diana Mochache, si Mackenzie ang may nagapanguna nga responsibilidad ukon ang may “primary criminal culpability” sa krimen bangud siya ang nagmando sa iya mga sumulunod nga magpuasa tubtob sa ila kamatayon.
“The sentence is appropriate and just, to send an unmistakable message that such atrocities warrant the maximum penalties allowed by law,” suno sa huwes.
Gin-set sang korte ang 100 ka tuig nga pagkapreso bangud sa homicide kag dugang nga 100 ka tuig bangud sa mga krimen nga may kaangtanan sa starvation.
Matandaan nga gindakop si Mackenzie sang 2023 matapos madiskubrehan ang kapin 400 ka bangkay sa manabaw nga mga lulubngan sa Shakahola Forest nga malapit sa baybayon sang Kenya.
Nagapangatubang pa gid si Mackenzie sang separado nga manslaughter kag terrorism charges apang ini ang iya nga ginpanginwala.
Ginbalibaran sang korte nga ipatuman ang silot nga kamatayon bisan pa nga ginpangayo ini sang mga piskal. Suno sa huwes, mahimo nga madula ang kahigayunan nga magbag-o pa ang mga naghimo sang krimen kun silot nga kamatayon ang idagdag batok sa ila.
Ginpahayag man sang huwes nga ginpatuman ang mga pagpatay paagi sa organisado nga sistema sang relihiyoso nga mga pagtulun-an kag mandu nga nagpilit sa mga sumulunod nga magpuasa tubtob sa kamatayon.
Samtang, ang 28 ka kaupod ni Mackenzie nakabaton man sang nagkalain-lain nga sentensya nga nagalab-ot sa 160 ka tuig nga pagkapreso.
Ginlaragway sang korte ang pagpamatay bilang “cold and calculated” kag wala man sang nakit-an nga paghinulsol sa mga suspek.
Matandaan nga antes ang conviction, lunsay sila nag-plead sang not guilty kag sulit-sulit nga nag-insister nga wala man sang ginpwersa agud nga mapatay.
Nagapati ang mga sumulunod ni Mackenzie nga siya ang mouthpieces ni Hesus, sandig pa sa eight-hour judgement nga ginbasa sa korte. Nadiskubrehan man nga ang mga nagapamatok sa mga ginatudlo ni Mackenzie ang ginakastigo tubtub nga mapatay.#
