ILOILO CITY – Arestado ang ginatudlo lider sang TBS gang sa ginpatigayon nga drug-buy bust operation sang Iloilo City Drug Enforcement Unit sa Barangay Sto. Niño Sur, Arevalo, Iloilo City.
Ang arestado nga lider sang TBS gang ukon ang kilala sang una nga True Brown Style amo si alyas Luigi, residente sang nasambit nga lugar.
May menor-de-edad naman nga lakip sa mga nadakpan.
Nakuha sa ila ang 120 grams sang shabu nga may standard drug price nga P815, 000.
Sa interview sang Bombo Radyo kay Police Lieutenant Colonel Antonio Benitez, Jr., pinuno sang Iloilo City Drug Enforcement Unit, iya ginpahayag nga halos tatlo ka semana nga ginpaidalom sa monitoring ang target.
Suno kay Benitez, ang lugar kun sa diin ginpatigayon ang operasyon ang ginapatihan man nga nagaserbe nga ruru-an sang mga durugista kun basehan ang mga na-recover.
Pahayag niya, ang source nga ginkanta ni alyas Luigi ang wala nakabase sa Iloilo City.
Ang target ang ginapahayag nga amat-amat nga nagatipon sang mga myembro sang gang nga ginapatihan nga liwat nga maga-operate.
Matandaan nga tuig 2010 sang na-neutralize ang amo nga grupo nga nagapang-hold up kag nagapamatay sang mga taxi drivers.
