Ginpanginwala sang mga lideres sang House Quad Committee ang pahayag ni Senator Ronald dela Rosa nga kabahin sang “demolition job” ang testimonya nga ginhatag ni anay Iloilo City Mayor Jed Mabilog sa House hearing sang Huwebes sa ginaalegar extra judicial killings sa idalom sang administrasyon ni Duterte.
Ginpahayag man ni Rep. Robert Ace Barbers nga ang quad comm bukas sa mga nagakaigo nga mga saksi sa ila imbestigasyon, nga handa sa pagpatuman sang isa ka affidavit, pareho ni Mabilog.
Ginpanginwala man sini ang mga pahayag nga si House Speaker Martin Romualdez ang yara sa likod sang ginapahayag “demolition job” agud pakalainon si Vice President Sara Duterte nga ginakabig nga posible makontra sini sa 2028 presidential polls.
Kon balikan, ginbuyagyag ni Mabilog ang gin-alegar plano nga piliton siya nga i-tag sanday Roxas, Drilon bilang ‘drug lords’.
Sa hearing sang Huwebes, ginsaysay ni Mabilog sa atubang sang Quad Comm ang “paralyzing terror” gikan sa mga pamahog sa kamatayon nga iya nabaton sa panahon sang administrasyon ni Duterte.
Sang 2017, ginpahayag ni Mabilog nga gin-imbitar siya sa Camp Crame agud makigkita sa anay nga PNP Chief dela Rosa, apang nakabaton siya sang paandam nga ang paghimo sini ang magabutang sang katalagman sa iya kabuhi.
Ginpanginwala man ni Mabilog ang anuman nga kaangtanan sa iligal nga druga, gindugang sini nga tubtob subong wala pa sang drug-related nga kaso nga ginpasaka batuk sa iya.
Ginpanindugan man niya nga ang nagligad nga mga pagtinguha nga i-angot siya sa ilegal nga droga ang “politically motivated”.
