ILOILO CITY- Ginatugyan na lang sang Liga ng mga Barangay sa Iloilo City sa kongreso ang posibilidad sang postponement sang barangay kag Sangguninang Kabataan (SK) Elections.
Sa interview sang Bombo Radyo kay Calumpang, Molo Punong Barangay Roberto Niño, spokesperson sang Liga ng mga Barangay sa Iloilo City, iya ginpahayag nga may mga bentaha kag disbentaha man kun madayon ang postponement sang eleksyon sa Disyembre.
Suno kay Niño, kun indi gid man madayon ang eleksyon, mas mahatagan sang kahigayunan ang iban nga opisyal nga may maayo nga intensyon sang malawig nga panahon nga makahatag sang serbisyo.
Apang pahayag ni Niño, nahangpan man niya ang iban nga barangay officials nga luyag naman nga magpahuway gikan sa ila mga katungdanan sa barangay agud nga makapangita sang iban nga career.
Nahibaluan nga una nga gin-postpone ang Brgy. kag SK election sang 2019 sang ginpirmahan ni anay Presidente Rodrigo Duterte ang Republic Act 11462 nga nagpaiway sang May 2020 barangay kag SK elections kag ginsaylo sa Disyembre 2022.
Apang sa mga hagna sa Kongreso, posible nga ma-postpone liwat ini kag i-schedule sa 2023 ukon sa 2024.
