Nagpangayo sang pasaylo sa publiko ang Liga ng mga Barangay-Iloilo City matapos wala nasunod ang physical distancing sa ginpatigayon nga vaccination program para sa mga senior citizens sa University of San Agustin.
Sa interview sang Bombo Radyo kay Punong Barangay Irene Ong, Liga ng mga Barangay President, iya ginpahayag nga ini ang labing una nga tion nga gingamit ang University of San Agustin bilang vaccination site.
Suno kay Ong, mabalik na lang sila sa Central Philippine University sa Lunes, Hunyo 21 sa pagpatigayon sang pagpabakuna.
Pahayag niya, wala pa sa schedule time kag date ang iban nga mga senior citizens nga nagpadulong sa University of San Agustin rason nga nagdamo ang numero sang tawo sa sulod sang buluthuan.
Dugang pa sang natungdan, apat ka mga vaccination sites ang plano sang Iloilo City Government nga pagahiwatan sang vaccination program sa tion nga madamo na nga mga COVID-19 vaccines ang maabot sa syudad.
