ILOILO CITY – Magabuligay ang Liga ng mga barangay sa pagbantay sa mga kabataan nga naga-intra sa mga grupo ukon gang kag nagatublag sang kalinong kag katawhay sa syudad sang Iloilo.
Kaangot sini, ginmando ni Iloilo Mayor Jerry Treñas ang executive order, epektibo kahapon nga adlaw, Nobyembre 23, agud himuon nga las 8:00 sa gab-i tubtob las 4:00 sa kaagahon ang curfew.
Ini ang kaangot sa natabo sang damlag lang, sa diin may yara sang serye sang kinagamo nga natabo sa Plaza Libertad kag sa Sunburst Park sa Iloilo City Proper kun sa diin involved ang mga pamatan-on.
Sa exclusive interview sang Bombo Radyo kay Punong Barangay Roberto Niño, spokesperson sang Liga ng mga Barangay sa Syudad, iya ginpahayag nga ginagamit sang mga kabataan ukon mga menor de edad ang online platform agud magrecruit sang mga myembro sa grupo.
Bangud sini, magapatuman ang liga ng mga barangay sang regular monitoring sang mga committee sa mga kabataan ilabi na ang mga naga-intra sa mga grupo ukon gang.
Pahayag sang natungdan nga lakip sa mga committee nga responsable sa pagbantay sa mga kabataan sa barangay amo ang Barangay Council for the Protection of Children (BCPC),Violence against Women and their Children, Sangguniang Kabataan (SK), Women and Children Protection Desk (WCPD) kag Non-Governmental Organization (NGO).
